Rev 13 | AOM | STEP | Sigobohuro sö jovo riröre raromamu naro gavodeje vörö'e mi sisë sö jovore jioromo rojomamu. Hesi simanoho aho'obëhe övo gö mine övo göre niö'i jiohijo. O hesi danoho aho'obëhe övo gö mine övo gö mine jiohijo. O a masijehu didi'aruëhi jië'e bosöho dane gemu gemu jio'amobe va'ohijo. O simane gemu gemu God agarue iho sisëho gemuohemu jajivo'amë'e jiohijo.

Revelation of John 13

Vörö'e mi niö'iehu rueromo mu sisë vaejare jöhoje.

1 Sigobohuro sö jovo riröre raromamu naro gavodeje vörö'e mi sisë sö jovore jioromo rojomamu. Hesi simanoho aho'obëhe övo gö mine övo göre niö'i jiohijo. O hesi danoho aho'obëhe övo gö mine övo gö mine jiohijo. O a masijehu didi'aruëhi jië'e bosöho dane gemu gemu jio'amobe va'ohijo. O simane gemu gemu God agarue iho sisëho gemuohemu jajivo'amë'e jiohijo. 2 Röhu ë vörö'e mi sisë hesi nu ano'oho leopard nu ano'o va'ëne jiohijo. O hesi höroho bear höru va'ëne jiohijo. Hesi jö'oho lion jö'o va'ëne jiohijo. Röhu rue sigobohuro darugo börömëro jië'ëro ë darugoho vörö'e mi sisëho bojamiromo uahijo: Na'o röromo röho maro ajio hiromo nasi öri ari'oho aho'o muebejehonëjo. 3 Röhu ë mi sisëho hesi simanoho gemu aëro anamu guomoromo i'ovë'ëro batato'e jiohijo. Guomoromo i'ovë'ëro batato'e jiamu ae aho'obëhe ëho garomo tiötiövoromo simane sisë'i uehorovoromo uvareje: Ëho mae höromo hesi ijore ijore jijihoruomohijo. 4 Hesi ijore ijore jijihoromo uvoruomohijo: Sigobohuro vörö'e mioho hesi darugoho mabëhe bojamijade höromo ëhuni sigoboho rajahiruomohijo. Sigoboho rajahiromo vörö'e miohu'o rajahiruomohijo. Rajahiromo uvoruomohijo: Ëvörö'e mioho darugo ma'e höjo. Rahuaro ëhi jië'e darugoho höjo. Rahuro ë vörö miohu'o muorovo'ajëjo. Ëhi uvoruomohijo.

5 Ëhi'ego God-ro ë vörö'e mi hesi öroho bogo tugohahohijo huro nimoronimorohë'i jö sisë jövoromo hesi nimoromo bövie bise'e muebebe va'ojuvo manaere aho'obëhe 42 barë'iröhego. 6 Öroho bogo tugohahë'ëro vörö'e mi sisëhuro ri'öromo God agoromo hesi ihoho ijumoromo God-hu hijaje öri ari'oho sivoromo God'o gemu mae ö'idöre raromarue aribövi jabesi sisëho sarerivoromo ëma jövohijo. 7 Jö sisëho ëhi jövo'ego God-ro ë vörö'e mi hesi öroho bogo tugohahohijo huro God-are ariböviohu'o muorovoromo ruahö'öjëvo'iröhego. Ruahö'öjëvoromo vöröho baeromo agane gö gö sa'ae dinö'e dinö'e huë gö gö sine gö gö aho'obëhe muebejëvo'iröhego. 8 Ae aho'o sa'ae dinö'e dinö'e raromaruoho jaburo ë vörö'e mi sisëho iae uvene aho röjahiruomo'ë'e. Uvene aho röjahi'iröhe hesi bëhoho urimo God-hu ö'idö sa'a bogo bamadevare evare God-ro a ioro'ioro jabesi ihoho hesi Sheep Harihu anego guomoröhe hesi surire jajivo'amadeje hu'o maro raromemu raromo'iröhego. A ioro'ioro jabesi ihoho suriroho bogo jajivo'amadeje bogo ëhioho maroho raromo'iröhego. Röhu iho bogo jajivo'amë'e sa'are raromarue ariböviohuro vörö'e mi sisëho rajahiruomo'ë'e.

9 God-are jö hejaruje aribövioho ave jöho hehëjo. 10 Aehu jemë guduamëvoromo savoji gagore ba'amëvo'ië'oho iae savoji gagoro ba'amëvo'ë'ö. O aehu muo'amëvamu vuovëvo'ië'oho iae vuovëvo'ë'e. Ëhi jië'e mu sisë rue'iröhohuni ëhuni God-are aribövioho jemëro biririvoromo God gemu uehorovobe va'ore.

11 Ëhi'amu gavodeje vörö'e mi sisë gö'o sa'a gagore jioromo rojomamu. Ëmi hesi danoho niö'i sheep harihu hesi dano jiajëhi ëhi jëvohijo. A'i huhu jö jövajoho ë sigobu börömehu jövajëhi ëhi ma-darugo'o jövohijo. 12 Ijore rovade vörö'e mi sisëhuro urimore rovade mi sisë hesi vöröe gemuoho bae barëromo huni röromo muoho vaehijo. Urimore rovade mi hesi muoho vaeromo sa'are raromarue aribövioho uëhijo jabumëro urimore rovade mi sisëho uvene aho röjahi'iröhego. Aehu hesi simanoho gemu anahamu guomoromo i'ovade ë hesi batato'e simano jië'e mioho rajahi'iröhego muoho vaehijo. 13 Ijore rovade miohuro urimore rovade mi hesi muoho vaeromo no bogo gavarue vörö'e mu masijoho vaehijo. Mu masije gö gö vaeromo röhu ae aho'obëhe jabesi nunire namiromo uvo'ego vënohuro ö'idöre jioromo sa'are ruvebihijo. Ëhu'o ë'ohijo. 14 God-ro hesi öroho bogo tugohahë'ëro ëhu'ëro ijore rovade miohuro urimore rovade miohuni röromo ëhi jië'e vörö'e muoho vaeromo ëhuro sa'are raromarue aribövioho sarerëmihijo. Sarerëmiromo uëhijo jabumëro urimore rovade mioho rajahi'i munë o rabe sehoromo inöme hesi nu ano'o va'ëne avohoröhego. Hesi simanoho gemu anahamu guomoromo i'ovade ë hesi batato'e jië'e mi hesi nu ano'o va'ëne avohoröhego. 15 Urimore rovade mi hesi nu ano'o va'ëne inömoho avoho'ego God-ro öroho bogo tugohahë'ëro ëhu'ëro ijore rovade miohuro ë mi nu ano'o va'ëne inömo hesi nu gagore jö'o ögëro huosihohijo mi nu ano'o va'ënohuro daruge baeromo jöe jövoromo garöhe ae rahu hesi öriroho bogo uvene aho röjahijego muo'amo'iröhego. 16 Ëhi'oromo ë ijore rovade miohuro a masijoho a ininoho inömo marohë'e aribövioho inömo rumo'e aribövioho a jabesi muemu vaejarue aribövioho jabesi nimoro mu vaejarue aribövioho ae aho'obëhe mae jöe bojëmiromo uëhijo: Ë'ego no jemesi övo manö o varijore jajivëharëjo. Jajivëharëjamu ejëho'ego jajivëhohijo. 17 Bogo ejëho'ibejo mi sisëhuro öroho tugohëhego iruno'oho bövioho bise'oho bogo imo'ibejo. Ëjajivëharoho mi hesi iheje.

18 Ëhesi bëhoho avoho uehorovore. Ae rahu simano ma'e jëvë'oho ë mi hesi iho hesi bëhoho nahoromo birohore. Hesi ihoho 666-je. Ëihoho avoho adahë'oho a ihe biroho'anue.